不請自來 終極拉票 阿佘爭視后阻雯女冧莊
無綫視帝、視后花落誰家今晚揭盅，日前雖傳出黎耀祥、鄧萃雯冧莊，但昨又傳佘詩曼返港出秘招令賽果陣前有變！另一邊廂，《2010亞洲小姐競選》十八佳麗鬥靚之餘，亞視也要與無綫在收視上鬥一番。
阿佘提早返港出席《萬千星輝頒獎典禮2010》，並在《MY AOD我愛TVB劇集頒獎典禮2010》中擊退雯女，贏得「我的最愛電視女主角」獎，昨日還盛傳她出秘招，令視后形勢有變，阿佘接受專訪時無奈說：「哎吔！我提早返冇秘招出呀！（聽到祥仔、雯女冧莊有冇失望？）我一直覺得係五五波，最圓滿結果係一對一齊攞，即係祥仔同雯女，或者陳豪同我，如果真係祥仔、雯女，我真心戥佢哋開心，佢哋做得好好，（傳你爭獎？）唔敢咁講，會令自己緊張，不過我今晚一定瞓得着，近日工作多好攰。」阿佘相信自己只會在頒獎一刻才會緊張，且無論贏或輸，她都會真情地表達開心或不開心，不會刻意掩飾。
心情如中六合彩
問到前晚攞獎會否令再下一城的信心大增？阿佘坦言：「好難講，呢個獎係代表馬來西亞人嘅口味，但攞獎當然開心，每個獎都應珍惜，而且呢個獎證明我喺香港以外都有觀眾支持。」雖然今年競爭激烈，但阿佘反而將心思放在扮靚方面，她早就搵了珠寶及靚裙贊助，心情大好的她說：「其實今年憑《公主嫁到》角色喺各頒獎禮上共攞咗五個獎，已經好好運，明晚花落誰家，自己都好期待，好似買六合彩咁，中就開心到暈，唔中都唔會失望，（前晚雯女木無表情？）唔會，佢上台致謝詞時都好開心，（話陳志雲復職有助雯女攞獎？）呢啲唔係一個人決定嘅，我相信評審制度係公正。」
玩埋終身成就獎
此外，昨日頒獎禮舉行拜神儀式，其實名單上阿佘並沒在採訪通告上出現，結果突然出現，似為自己努力拉票。席間阿佘與獎座合照時，旁邊的惠英紅笑阿佘攞「終身成就獎」，逗得她開心大叫「好」。
文：影視組 攝：沈健程
場地、服裝：Arthur Lam