將於明年首度來港演唱的美國鄉謠天后Taylor Swift，向來對圈中男星情有獨鍾。日前有傳Taylor與荷里活男星積佳蘭賀在蜜運中，兩人更斷正被fans影到連續兩日同遊紐約。
在剛過去的周末，Taylor為了捧擔任主持的好友新蜘蛛女Emma Stone場，帶着積去電視台睇《周末直播》錄影，有知情者說：「佢哋去後台參觀，但好小心唔敢行得太埋，好難講佢哋係咪拍緊拖，但Taylor帶阿積出現令個個都震驚。」
翌日兩人與另一對情侶在布魯克林食早餐及行公園，期間有fans影到二人企得好埋，留了鬍子的阿積跟Taylor邊行邊密密斟，有目擊者指他們如情侶般手拖手行街，其後阿積去了中央公園睇Taylor演出。二人約會雖斷正，但雙方的發言人對緋聞封口拒回應。
另外，昨日Taylor在曼哈頓的演唱會上大唱新歌，眾fans為了在網上睇直播而搞到多個網站大塞車。而為了迎接來年的香港騷，唱片公司宣布於昨日開始凡買Taylor的新大碟《Speak Now》就可獲贈不同款的限量版文件夾。
向來留有招牌金色曲長髮的Taylor，最近為拍攝Target百貨公司的新廣告而戴黑色短假髮示人，感覺煥然一新。
文：外娛組