明星快拍：RubberBand隨意拍有深度
組合RubberBand的音樂作品富有深意，攝影作品當然亦不遑多讓。五子閒來都愛影相，雖然不是揸專業相機，但勝在意境搭夠，絕不是無聊自拍咁簡單。其中以主音6號最愛影相，身為導演的他經常為搵靚景找靈感，鏡頭觸覺特別敏銳。
成員阿正作品：「呢個係RubberBand新碟《Connected》附送嘅限量版太陽眼鏡，老闆贊助一千副。嗰次落舖頭做宣傳，無無聊聊影咗張相，當然咁有價值嘅新碟禮物，都要影幅相留念啦！」
成員阿偉作品：「之前加拿大嘅電台邀請我哋去做騷時影嘅。嗰日我哋起程踩單車就落雨，要喺樹下面避雨，好彩有驚喜，出現雨後彩虹。之後天公作美，天朗氣清，嗰個係泥鯭嘅背影。」
成員泥鯭作品：「加拿大單車之行，我哋踩到去Stanley Park，見到天鵝喺平靜嘅水面漫游，畫面真係好靚！」
成員阿正作品：「都係加拿大做騷，後台見阿偉拎住支結他擺晒甫士好有型，同埋個『Very Quiet Area』告示好得意，所以就影低咗呢個Moment。」
成員6號作品：「『連儂獸』係我哋新碟嘅主角，呢張相係我哋拍緊《天連地》MV嘅時候影嘅，喺現場我不時會喺唔同角度影相嚟睇效果。」