陳靜雌雄愛貓無緣結合
陳靜相信人與人的愛情要講感覺，而寵物之間也一樣，沒有感情基礎並不可以隨便結合，她家裏的兩隻小貓便只有做姐弟的緣分。
獨居而養有兩隻小貓的「百果園咪神」陳靜（DaDa），一早習慣與貓為伴，每天工作後回家必定會看見一對愛貓在家門後等她，她坦言當初挑一雌一雄小貓，是打算讓牠們好好培養感情繁殖下一代，怎知兩隻貓卻不多情願，DaDa說：「佢哋唔係咁鍾意大家，成日都打交，後來我帶佢哋做咗絕育手術，依家佢哋做唔成夫婦，惟有做咗兩姐弟！感情好似比以前仲好添，所以話男女之間都唔一定要拍拖嘅。」
床上小便激餐死
陳靜透露兩隻貓分別叫「MiMi」和「小虎」，她說：「最初係見家姐養貓，覺得好得意，加上自己都幾忙，養貓唔使花咁多時間照顧。其實我兩隻貓都好得意，平時好少畀到麻煩我，唯一一次兩隻貓見我懶冇幫佢哋清潔貓廁所，故意喺我床上小便，哇！我嗰日做完嘢返到屋企好攰，真係好激氣，罰佢哋兩個星期冇得食最鍾意嘅蝦零食，唉！貓小便好難清理，最後都要換埋張床褥先得。」
養貓最緊要堅持
DaDa表示雖然養貓要負上一點責任，但看見小貓滿意地生活在自己身邊是一種享受。講到養貓心得，DaDa說首先一定要有足夠的心理準備，每隻貓平均壽命有15至20年，貓主一定要堅持到底，不能隨便放棄牠們，還有一個小貼士，就是有貓貓的家千萬不要將膠袋到處放，因為一般來說貓貓都貪玩，分分鐘會鑽入去焗親。
文：影視組