周潤發：乜都唔想帶走
周潤發鍾情光與影，對捕捉剎那間的執着似乎已發燒得魂不附體，攝影彷彿已佔據了他的第二生命。徘徊光與影十年，蜿蜒走上黃山之巔，再入少林寺涉獵《易筋經》，從浩瀚大自然中頓悟世間最簡單的何謂「平淡是福」，他決定把畢生財產還諸塵世，簡單一句「臨走時乜都唔想帶走」，更讓我們明白這位巨星的氣度，永遠餘韻縈繞……
周潤發：發 記者：記
驀然回首 笑看風雲
有人攀龍附鳳，為的只是帶不走的功名利祿。發哥在這拜金世界追逐多年，赫然發現身體負荷不了，不想在這死胡同兜轉幾圈，惟有決定改寫自己下半生。
記：比爾蓋茨（Bill Gates）、巴菲特（E.Buffett）等超級富豪講過會捐晒全部財產出去，你會唔會效法？
發：我要講，所有錢都唔係我嘅，只係我搵番嚟，並唔代表我要永遠擁有！如果我死會將99%財產捐出，臨走時乜都唔想帶走。依家人生在世，我有得食有得住，仲想點！
記：同周太（陳薈蓮）已有共識？
發：冇錯！我哋已有咗自己安排，太太都好贊成！
參透生死珍惜親人
記：怕死嗎？
發：生老病死係正常，人始終都要走！只要懂得珍惜，做好自己嘅事，做演員就要記好對白，對家人要多啲關懷，係要用行動去做，唔係用言語，無論對媽咪、老婆、朋友……我都一視同仁。總之人生在世，我宗旨永遠都係「平淡是福」。
記：透露一下生活時間表？
發：好簡單！平日大概五點到七點起身，要出去影相就四點起床，之後就做做運動，睇吓書就食飯。晚上一定要睇電視，睇完TVB兩線劇集，十點半就瞓覺。只係正常生活，以前捱更抵夜得多，身體自然有毛病，我有好多舊患，老咗就發晒出來，所以一定要調適。
愛做運動練易筋經
記：五十五歲的你點養生？
發：我鍾意做運動，我嘅運動就係拉筋，我依家學咗一套少林寺嘅《易筋經》，宗旨係「筋長一吋，命長十年」，其實並非甚麼武學，係達摩祖師創畀武僧嘅收息運動。只係柔軟體操，最啱我呢啲懶人做。
記：會特別注重飲食？
發：食嘢都係清淡為主，魚同青菜真係好足夠，依家我只會食半碗飯就夠！仲有係切忌飲凍飲，因為人嘅體溫有三十七點幾度，凍飲最暖都有十幾度，胃係承受唔到咁大嘅反差，總之食療好過藥療。
記：所以Keep得咁Fit？依家有幾重？
發：真係瘦咗，有運動新陳代謝就快，加上食少咗，所以依家Keep住165磅，但上鏡最好有160磅，睇落瀟灑啲！不過我拍《上海灘》時只得140幾磅，係瘦，但好睇，所以我好羨慕秋官（鄭少秋）咁瘦！
文：霆 攝：劉智源