祖兒踩車炒旅巴撻歪腰
樂壇天后容祖兒腰患復發，自爆月前發生炒車意外，騎單車時與旅遊巴相撞，像空中飛人飛撻落地，連腰骨都撞歪。對好友林峯傳出的多宗負面新聞，祖兒力撐對方為人，更對他讚不絕口。
容祖兒昨晚聯同古巨基、林峯、楊千嬅、許志安、謝安琪、何韻詩、曹格、周麗淇、側田等出席《新城邁向20聲光綻放音樂會》，穿上Toga品牌紅色流蘇裙的祖兒，透露最近腰痛復發，自爆兩個月前踩單車時，手提電話突然響起，她即一手聽電話，一手控制單車，怎知失平衡衝向前面一部旅遊巴，她本能反應即刻用腳頂住旅遊巴，但因衝力太大，她說：「我成個人拋物線咁撻落地，連手機都飛到勁遠，個人冇咩事，手腳就瘀咗少少，可能係咁，最近排舞條腰好痛，原來條腰骨又歪咗！」目前正接受針灸及脊醫雙管齊下治療。
做完個唱翌日首映
對於好友林峯日前被某傳媒製造連串負面新聞，祖兒力撐對方為人，大讚對方專業，她說：「因為拍戲認識佢，喺我眼中佢係一個好大體嘅人，有驚人耐力，即使做完演唱會，翌日仲要去做首映，換轉係我都可能太攰唔去，（話佢掛住打機唔讀劇本？）佢熟讀劇本，連我嗰份都背。（傳佢遲到？）我識嘅佢唔係咁，有時拍劇遲到五到十分鐘都好合理。」
林峯對有傳他態度囂張、拍戲掛住打機又遲到等負面新聞，他大方回應笑謂：「過幾日就會變成十七宗罪。」他表示入行十二年，並非第一次有這種傳言，他說：「都唔係第一次畀人講，我會先檢討自己有咩做得唔好。同我拍劇嘅工作人員都好錫我，知我唔係啲咁嘅人，我會盡力做好自己嘅本分。」
「點做都會有人批評」
問他是否樹大招風？他淡然說：「無論點做都會有人批評，好似出道時有人話我寸，因嗰時自己唔出聲。」此外，林峯前晚在佛山頒獎禮上，對劉丹兒子劉愷威被指變臉後貌似他，林峯笑說：「呢個報道十分搞笑。」對於劇集《摘星之旅》收視情況，他表示不擔心收視，他說：「收視成績唔係自己控制到。」
文：音樂組