朱紫嬈溫泉換衫驚遇男人
樂壇實力派女新人朱紫嬈（Khloe）最愛食嘢，故她去親日本旅遊時也是「食字當頭」，另一難忘事，就是有次遇上男人闖入溫泉女更衣室，幸好她剛着好衫，否則就被人睇晒全相。
Khloe每隔一、兩年就會到日本旅行，不過她到東瀛的主要目的，並非瘋狂掃名牌，而是和趣味相投的親戚好友到處覓食。兩年前，Khloe和表哥、表弟到日本展開「喪食之旅」。在多天「賽後檢討」後，Khloe力薦一間名叫「無敵拉麵」的食店：「我本身唔係咁鍾意食拉麵，但呢間拉麵店啲麵就好唔同，除咗啲麵夠彈牙外，啲豬骨湯真係好正，好濃味，好杰，好味到我食每一啖麵時，都忍唔住飲番啖湯先。」
拉麵彈牙 海膽鮮甜
而另一令Khloe食指大動的，就是一間日本餐廳的刺身，她滔滔不絕說：「我真係未食過咁好食嘅海膽刺身，一啲腥味都冇外，一咬落去好鮮好甜，甜到好似糖水咁。」Khloe笑說：「初頭見到啲本地食客食完要喺餐廳門口影相，就覺得佢哋好傻，依家終於明白點解要拍照留念。」
另外，Khloe自言怕醜，故不敢浸露天溫泉，只在酒店內的小溫泉浸一浸，問她可有難忘經歷？Khloe稱：「有呀，有次喺溫泉更衣室見到日本男人入咗嚟，我嚇到呆，心諗好在我着番衫，但有啲女仔冇着衫，就畀人睇蝕晒，當時啲女仔嚇到全部尖叫。」據Khloe了解，日本溫泉有換更時間，相信有男人入女更衣室全因要轉場。
文：音樂組