翠翠：聽到都好痛心
葉翠翠未入行前曾在獸醫診所工作，對於Henry Lau事件，她也大感無奈：「我唔識Henry，但聽到都好痛心。我知有啲貓狗真係潛在突發腸炎或心臟病，有可能喺一個鐘頭內突發身亡。可能BeBe真係有突發性隱疾，亦有可能係醫療失當，好難講！」她認為要選擇信譽良好的獸醫時，事先要做好資料搜集，寵物亦要定時做身體檢查。
容祖兒：「就算立例仍然有人用唔小心同唔正確態度處理小生命，重點係小生命被交託喺你手上時，希望會用專業態度去令小生命獲適當治療。」
梁詠琪：「好可惜，每個人都好錫自己隻寵物，都會同寵物建立咗感情，我就習慣去相熟嘅診所，感覺安全啲，做獸醫嘅都應該有醫德，佢都係一條小生命，大家應該要互相尊重。」
一貓之主的趙碩之慶幸從未遇過這些事情，她認為醫人要醫德，醫寵物也要有醫德，若貓咪生病必會找信譽良好的獸醫診治。
視貓如仔女的周柏豪，家中飼養了五隻貓，曾失去貓仔的他明白Henry的心情：「我都試過向好多間獸醫求助，有啲獸醫冇乜交帶，就算解決唔到問題，主人至少希望了解發生乜事，我懷疑有啲獸醫經驗不足，靠朋友介紹搵一間可信嘅獸醫。」