君如篤爆囡囡網睇禁片
吳君如昨日帶同愛女到中環行街shopping，她在電台訪問中表示享受愛女黐身的感覺，令她灑脫地推卻片約，君如又自爆愛女於YouTube睇到「不應該」睇的影片，一度令她非常擔心。
君如昨日帶同囡囡陳是知及外傭到中環行街，君如戴黑超，是知拎住毛公仔，兩母女拖到實大晒天倫樂，外傭則隨後拿住兩大袋戰利品，看來收穫不錯。
老公話避無可避
昨早君如接受查小欣訪問時大談湊女經，問她會否讓愛女看新片《得閒炒飯》？君如坦言是知經常與她及陳可辛（Peter）齊齊睇電影：「屋企早幾日裝咗個視像電話，個女就用個電話YouTube功能上網睇咗啲唔應該睇嘅嘢，仲同我講好得意添，我初初聽到好緊張，即刻同Peter講，不過佢覺得呢個世界就係咁，好多嘢避無可避，最多之後同個女解釋番，所以我都會畀個女睇。」
享受個女黐到實
愛女如命的君如坦言暑假期間不接工作，做個全職媽咪陪愛女：「冇對住佢幾個月，佢就會唔黐我o架喇，依家佢都不知幾黐我，連我行半步出街都攬住我隻腳呀，不過我真係好鍾意佢咁！」她坦言金錢買不到親情，為免錯過愛女的成長歷程，會不惜推戲。
對於戲中飾演女同性戀者，君如直言向來受同志歡迎，但不會受不住誘惑，可會擔心Peter被撬牆腳？她笑謂：「聽到呢個問題都好興奮，任達華都叫我小心啲！」
文：音樂組 攝影：追蹤組