宣萱Bobby又愛又恨
歐陽震華（Bobby）、宣萱合作無間，兩人性格相近，但又互相箝制，走在一起無論遇着甚麼事甚麼環境，都只有笑聲不絕，堪稱最佳拍檔。
事業愛情兩得意的宣萱，講到明炎夏不開工要放暑假，惟獨是Bobby及陳錦鴻可以例外，宣萱直認Bobby是其「最佳拍檔」：「拍劇咁辛苦，收視控制唔到，但同咩人合作就喺自己控制範圍內，拍嘅過程開心好緊要，Bobby係開心果，只要望到佢個樣就已經開心，成隻加菲貓咁。」
一遲到出追魂call
不過，向來準時的宣萱，對會遲到的Bobby也有怨言，在旁的Bobby搶着說：「約佢三點鐘佢真係會兩點五十八分到架！因為冇街去囉！不過今時唔同往日，佢依家有拖拍。有次約佢睇張家輝嘅《証人》，我特登早到，睇住佢去到戲院就打電話畀我，我話就喺佢後面，嚇咗佢一跳。」
然而宣萱對Bobby似乎特別容忍，認為不是太離譜，半個鐘屬可以原諒：「男人開工化妝時間少過我哋，佢遲啲返都得。」但Bobby就繼續「狙擊」：「佢同我老婆一樣，成日催出門口，話唔好叫人等，佢哋都係等街去嘅人囉。」宣萱反擊說：「我守時啫。（明知對手遲自己都守時？）同熟嘅就可以溝通，佢都唔敢再遲，我會哦佢架。（唔熟又頂唔順點算？）如果遲到嘅通常導演會出聲，如果好惡劣嘅都要忍，咪下次唔再合作囉。」至於Bobby的另一缺點是不正經，幸而大家拍得開心愉快。
大牌都要捱單打
事實上《施公奇案Ⅱ》是Bobby入行以來拍得最辛苦的一套劇，每日開工又熱又睡眠不足，外景曬到幾乎中暑還要接入廠，Bobby說：「我試過唔除頭套就沖涼，拍到個人好躁，好在宣萱、陳山聰好體諒，安撫我慢慢嚟，所以拍檔唔夾就大鑊！」但不是人人像宣萱般願遷就，連Bobby也試過被某演員「畀說話聽」：「話出去飲杯水先，因為唔知要拍到幾時喎，咁辛苦，梗係講對白愈夜愈攰架啦！」
宣萱對Bobby百般遷就，他又欣賞宣萱甚麼？Bobby搞笑說：「身材好啦、樣又靚！佢嘅身材係禾稈冚珍珠呀，人又有愛心，專收流浪貓、流浪漢，哈哈……」宣萱隨即抗議：「好多男人都話自己身邊嗰個唔使太豐滿，大嗰啲睇就得。」最難頂宣萱甚麼？Bobby即轉聲扮宣萱，陰聲細氣說：「喺邊度呀？未見人就變晒聲打嚟問你喺邊，好鬼驚！」
愛自由唔恨生
宣萱與外籍獸醫男友Ruan拍拖雖不到一年，感情已十分穩定，坦言互相視對方為結婚對象，但不急於結婚：「都係拍咗幾個月拖，可以慢慢行吓睇吓，唔一定要畀年齡限制住。」
Bobby與太太傅潔嫻出名恩愛，對宣萱可有啟發？她說：「哈哈哈……唔生小朋友可以自由自在囉！佢哋兩個好夾好sweet，鍾意周圍食嘢、享受生活，最緊要兩個人一齊決定就唔會錯。」
玩到底褲都濕晒
雖然Bobby處處「窒住晒」，宣萱卻從來冇嬲過他，像年前拍《美味關係》有場戲拍她暈咗，Bobby要用口含水噴醒她，竟然成盆水照頭淋，宣萱說：「連後備底褲都濕晒呀！但我淨係識喪笑，跟住好快咁補番個妝出嚟再拍過。」Bobby說對其他花旦就未必可以這樣放肆：「有啲睇樣就知唔得，同宣萱拍《壹號皇庭Ｖ》睇到佢有玩得嘅潛質。」
文：影視組
攝影：林蔚恩
場地：Beira Dos Namoradosa