周秀娜發力上下夾擊
周秀娜與Angelababy前日於尖沙咀同一時間舉行簽名會，但周秀娜因着錯衫加上被Angelababy隔空暗寸，被指先輸一場。周秀娜終於知錯，昨日再戰簽名會時，立即與一眾師妹穿上低胸裝束現身，簽名時更不經意露底益fans，力挽狂瀾！
周秀娜昨日下午連走兩場，於銅鑼灣及灣仔與師妹們為fans簽名。下午三時，周秀娜與A .Lin、Annie G.及Hailey C.到銅鑼灣總統商場舉行最後一天簽名會，周秀娜明顯比前日性感，短裙低胸上陣吸引近五十名fans，問她是否因輸給Angelababy才變回性感？她說：「冇！連日來啲衫都已經安排好！」
只望贏自己
至於Angelababy指不視她為對手，她說：「我冇諗過同任何人比較！冇諗過同人爭！只希望贏自己！」她又稱只希望突破去年三萬本的銷量，又謂：「我都覺得自己尋日有少少揀錯衫，唔應該着黑色吸熱！」至於Angelababy暗示自己不需像她一樣辛苦宣傳，她說：「其實好開心，唔覺辛苦，公司租車搞簽名會，唔會造成混亂。」
此外，問到傅穎懷疑她的寫真銷量一事，她說：「我同佢冇誤會，其實我哋拍緊一部打排球嘅戲！」至於是否覺得對方「好波」？她即時笑說：「好波？球技唔知，我同佢都唔係運動員！不過我哋之前都講好遲啲會交換寫真！」
微博謝粉絲
另外，Hailey C.、A .Lin、Annie G.對於寫真集被指意淫，A.Lin說：「唔可以一竹篙打一船人！可能佢都未睇晒寫真集，連我本寫真集個書名都未知！」
而流動簽名會最後一站於昨日下午六時在灣仔金紫荊廣場舉行，期間吸引超過百五名fans到場，周秀娜簽名時亦不忘在微博上載相片多謝fans連日支持。
文：名人組