秋生鬧爆周秀娜無腦犯眾憎

黃秋生昨出席鍾景輝自傳記招，甫到場便被記者追問對近日o靚模出位行為有何睇法？他笑謂：「依家群妖亂舞、事業線同黑氣都沖晒天，簡直挑戰道德底線、婦女團體同政府啦。（唔支持？）每種職業都值得尊重，但有啲嘢毋庸置疑，係唔可以有偏差，佢哋嘅做法等同妓女上街遊行，但行埋入屋邨度，撩鬼攞命囉。我哋睇書嘅，但有佢哋喺度都唔會行入書展。佢哋可以十三妹結義，之後自己搞個書展喺附近抗衡。應該乘勢推出相書，教人點睇全相囉。」秋生口中的「十三妹」，原來是指周秀娜曾向外公布她跟同公司的師妹想出copybook橋殺入書展，秋生幫該十三人起了「十三妹」稱號。

蠢在挑戰大眾價值觀

秋生之後出席另一個活動時，被問到o靚模對其言論要申訴時即稱：「叫佢哋搵紫藤（性工作者關注組織），周秀娜知唔知紫藤係乜嚟呀？佢哋應該開個Column，叫『十三妹書展』，搵周秀娜做會長！佢咁叻，咁多橋，（點睇「撕暴片」嘅Debby？）　咪係其中一個，大家都係各出奇謀，佢哋最蠢嘅地方就係挑戰大眾嘅價值觀，簡單講係犯眾憎，（覺得佢哋好cheap？）好明顯，喺街度撕爛啲衫，男仔都唔好，仲話女仔。」

秋生愈說愈興，有記者問他有何建議給周秀娜時，他板着面認真地說：「收聲囉，喺第二個地方搞書展，佢哋有足夠嘅力量搞。性工作者去遊行無問題，但去太古城有家爺仔乸嘅地方遊行就有問題。」他還就周秀娜指書展虛偽及低能的言論，反諷對方：「咁係咪你就好坦白同好高智商？佢一句說話就鬧晒所有支持書展嘅人。」

斥唔識分色情與藝術

秋生又直斥周秀娜有小聰明、ＥＱ高但無智慧，可能讀得書少，有記者問他怕不怕周秀娜會指他無修養？秋生表示：「修養，If she got any，互相謾罵唔係宣傳手法，好似我當年拍三級片，唔能夠講話係拍藝術片，咁講只會係我唔識界定色情同藝術嘅分別，好明顯佢係唔識！」

對黃秋生的指摘，周秀娜未有回覆，Debby則關掉電話未有回覆，其經理人代稱現階段不作任何回覆。

文：影視組