婷婷撐Lucas冇恰細佬
謝霆鋒和張栢芝的寶貝仔Lucas被指做粗口手勢和欺負細佬Quintus，身為姑姐的謝婷婷愛姪情切，昨日出席活動時急急為Lucas解畫；至於Quintus的中文名及會否擺滿月酒？婷婷都拒絕漏口風。
謝霆鋒和張栢芝的第二個寶貝仔Quintus出世，哄動全城，謝家上下連日成為傳媒焦點，日前有指Lucas做出粗口手勢，以及搣細佬，向來疼錫Lucas的婷婷，昨日應邀出席CLINIQUE概念專門店開幕活動時，即為Lucas解畫。
婷婷說：「佢幾歲人仔，佢唔知嘅！」說罷更邊做手勢邊說：「佢成日都係咁㗎。」不過婷婷就相當小心，未有做出不雅手勢。
稍後約栢芝吃飯
至於Lucas又被指搣細佬，婷婷再度護航：「冇見到，上次我喺醫院抱Lucas玩時都冇見到，佢梗係錫晒細佬啦。」
婷婷被問起Quintus的中文名時，她回應說：「呢個真係唔知。」至於謝家會否為Quintus擺滿月酒或百日宴？婷婷認為BB才剛出世，應該未有咁快。對於阿嫂張栢芝秘密出院回家，婷婷未有漏口風，護嫂情切的她說：「唔知呀，呢幾日忙工作，冇打畀佢，而且佢都要休息。」婷婷謂稍後會約栢芝吃飯，及買禮物送給她。
圓圓爆子丹貪靚
昨日出席的還有吳嘉龍、汪圓圓、王惠敏及陳沛嘉等，圓圓以一襲Zara連身裙現身，大讚同場的古天樂愈來愈有男人味，自爆揀男友會揀皮膚黝黑的：「我白佢黑，一黑一白吖嘛。」此外，圓圓踢爆姐夫甄子丹很貪靚，指他不時敷面膜護膚。
文：名人組