星爺認老急搵接班人
【呂詠雯廣州直擊】正籌備拍攝《喜劇之王２》的周星馳，最近積極於各地物色新演員，說到《喜》片第一集的女主角張栢芝，星爺坦言欲找對方客串一角，並爆當年仍是新人的栢芝教了他不少：「佢教我好多嘢，仲叫我鎮定啲唔好驚！」
星爺昨日到廣州出席「《喜劇之王２》星呢選秀大賽」，更被司儀以「喜劇之王教父」來介紹出場，即席敲響銅鑼寓意比賽正式啟動。說到是次的選秀比賽，星爺直言希望可從中找到《喜》片的主角：「希望可以搵到啲有創意嘅人，一定要有喜劇感，十幾年前喺香港都搵到，內地咁大咁多人才點會冇？」
費神憶往事
曾提拔不少新人的星爺，表示每次跟新人拍戲都學到新事物，而當記者問到他十年前跟張栢芝拍攝時的感覺，他想了良久說：「依家年紀大，齣戲係十年前嘅事，我印象中佢係個好有天分，好多嘢都唔係我教佢，反而係佢教番我，呢啲（指演戲天分）係天生嘅，佢仲叫我鎮定啲唔好緊張。」星爺除了即席恭喜栢芝再誕ＢＢ外，他又坦言希望可找對方客串新戲：「我梗係想啦！不過佢依家咁忙，未必肯架喇！」
用內地導演
現時已轉攻幕後的星爺，問到他可會考慮再當主角？他斬釘截鐵表示：「唔需要，我依家係搵人才，如果搵到人才根本唔需要我，亦唔擔心市場會接受唔到新人。（你會客串？）都唔會，我鍾意做幕後，留番畀啲新人發揮啦！」說到他的幕後班底已各散東西，星爺則表示由於《喜》片會於內地取景，故班底起用內地的編劇及導演：「齣戲會喺年底或明年初開拍，幕後已經定咗，遲啲公布，當然都會搵田雞等客串。（同小瀋陽有合作？）依家傾緊。」