麥玲玲李丞責擺和頭酒傾掂數
堪輿學家李丞責因麥玲玲的一些言論而控告對方，但麥玲玲亦決定還以顏色，令二人口舌之爭鬧上法庭。不過，最近有消息傳出，指有中間人拉攏二人擺「和頭酒」言和，實行大事化小。
據知為李丞責跟麥玲玲做「和事老」的人，正是金牌大風香港區主席黃柏高（Paco）及無綫高層何麗全。Paco先調停紛爭，再由何麗全致電麥玲玲相約食飯，希望這餐「和頭酒」能夠擺平李丞責和麥玲玲之間的誹謗訴訟。
冇需要道歉
記者昨日向身在內地工作的麥玲玲了解，玲玲承認Paco及麗全有聯絡她，既然大家能碰面傾這事，代表萬事都可以解決。她說：「Paco好識處理危機，能夠大事化小，我好尊重佢，而麗全亦好客氣打電話畀我，其實麗全係一個好有江湖地位又公正持平嘅人，兩個前輩我都好尊重。」
問玲玲還有打算告上法庭嗎？她表示：「大家有機會碰頭，當然會傾一傾，因為唔知佢（李丞責）心意係點，不過有誠意嘅，當然會Hold住，其實都唔係太大件事，（有人需要道歉？）咁又唔使。」
唔想傷和氣
而何麗全昨日亦回覆記者，表示大家都是朋友，不想因這小事而傷和氣，而且鬧上法庭亦會影響他們主持的無綫相關節目。何麗全說：「好無謂，和氣生財嘛，發生呢件事時可能冇人喺中間溝通，先有誤會，相信大家坐低傾就冇問題。」至於李丞責在截稿前仍未有回覆。
文：影視組