不死丹靈

牛仔褲永遠是不死的潮物，而其靈魂則是丹靈（Denim），而今季的時裝圈更湧現丹靈物，無論是衣衫褲類如蛤乸衣、Boy-Friend Jeans和牛仔恤，小配件如手袋、高踭鞋等，都成為潮人趕潮流的通行證。

Jumpsuit同埋洗水Denim係今季大熱，佢Carry得都OK！識得用好多手鏈做配搭，睇落冇咁齋。如果髮型梳鬆啲有一種Wild感覺，會係完美的80's Look。

Diesel：Jumpsuit

Biker Jacket同窄腳牛仔褲永遠都係穩陣冇死錯人，如果婷婷換上一條牛仔連身迷你裙，效果會好好多，襯番晒佢把咁飄逸的長頭髮。

髮型有啲高貴隆重，同呢身Country Wild嘅Outfit完全唔夾，但呢款牛仔恤襯迷你裙好適合佢嘅年紀同埋個人形象，好突出，只係衰在個髮型係敗筆。

D&G：牛仔恤、半截裙

毛茸茸短冷衫襯低腰Skinny Jeans，感覺唔熱又唔凍。有啲似60-70's嘅陳寶珠、蕭芳芳，Mohair冷衫仲要紮起馬尾，感覺好媽咪，同佢嘅年紀、形象一啲都唔夾。

對絲襪太黑、太實色，着Biker Boots上身應該襯番Mini Biker Jacket，皮款會仲好一啲，依家佢襯恤衫，又唔夠修腰，九唔搭八。

鬆褲襠嘅Boy-Friend Jeans，同上身比較鬆身剪裁嘅紅衫Style唔一致，最好都係搵件剪裁貼身少少嘅衫嚟襯會好啲，如果唔係會顯得好水桶！

過頭笠的丹靈連身裙，配搭係好安全，係討好，但條粗皮帶破壞咗荷葉邊帶出嘅Girlish味道，冇皮帶好好多。

Zara：連身裙

於1996年創立自家品牌SPY Henry Lau的本地著名時裝設計師Henry Lau（劉志華），先後為時裝世界精英大獎（FWTA）和亞洲星光大道的評審。又曾為梅艷芳和李克勤設計演唱會戰衣，亦曾為何韻詩設計舞台劇服飾。