Mia認樣衰打Botox蛻變

有「港版Leah Dizon」之稱的o靚模Mia，自成為新八模成員後，即被大起底，被爆育有一子一女兼離婚，正跟郭秀雲兒子錢景峰拍拖。

昨日再有讀者爆料，指她原名為Boey，入行後改名，同時提供多張疑似整容的舊照，相中所見，Mia「疑似大執」後判若兩人，臉形、鼻翼、顴骨和唇形出現很大變化。

改頭換面面尖鼻窄

現時擁有一張甜美娃娃臉的Mia，被指曾「大執」變成V形尖面、鼻翼收窄，據知，Mia的前夫更是一名整容醫生，未知她的變化是否與前夫有關。決心加入o靚模寫真戰的Mia，在Facebook內已刪走所有舊照，只有大量靚女相及與男友錢景峰的親密照，當中二人到日本旅行在酒店穿上和服親密合照，錢景峰從後攬實女友。

昨日記者致電Mia求證，她承認舊照是相中人，但卻否認整容：「我冇整容，只係打過Botox同箍牙，當時18歲生完BB，覺得自己有baby fat所以打Botox，係打塊面。」

前夫不是整容醫生

提到舊照像是另一個人，如今鼻挺眼大，對出現如此大轉變，Mia說：「化妝技巧唔同，依家啲技術咁先進，以前啲相確係有啲變化，加埋打燈，嗰陣仲細，依家21歲個樣已經唔同。（但你依家鼻直咗同眼變大？）嗰陣有咗，一日嘔十次，成日入醫院，個樣係衰啲。（有傳你前夫係整容醫生？）一定唔係，呢個好肯定，佢只係普通人，如果佢係整容醫生，我就唔使出嚟做。（仲有聯絡？）會同佢傾小朋友問題，好似搵學校。（人哋話你係Leah Dizon倒模？）我覺得唔似，佢靚啲，大家唔同類型。（有冇試過畀人認錯？）有次喺日本行街試過畀日本男仔認錯，不過我用英文同佢哋講唔係。」

文：專案組