楊秀惠拖金融才俊煙韌示威

前晚模特兒莊思敏於灣仔舉行生日派對，除了男友吳浩康及其一班好友撐場出席外，場內更令兩段神秘感情曝光!當晚深夜11時半左右，一名身穿白色Tee的四眼男子與楊秀惠雙雙現身，二人還公然手拖手進場，起初楊秀惠只乖乖坐在一旁讓四眼男與朋友打招呼，當大夥兒合照時，她又醒目地迴避鏡頭。之後她又忍不住與新歡親暱地面貼面咬耳仔，而當四眼男向她表示會離開一陣子時，她更情深地拖住對方的手，表現難分難捨，兩人如熱戀中情侶。其後發現有人拍照，二人即時驚青走人。據悉楊秀惠新歡叫Ray，是莊思敏一對孖生妹妹Mona的好友，現於金融界工作，由於家中富裕及人面廣博，所以於朋友介紹下認識楊秀惠，兩人發展迅速。

媽咪都讚男友好

為此記者致電楊秀惠，談及新戀情她早有準備，坦承對方是「好好朋友」，她說：「大家仲係了解中，試下有無機會發展，而且最近媽咪來香港，我都有介紹佢畀媽咪識，媽咪都話幾好。（你日前話自己冇拍拖，現在有男友驚唔驚畀人話大話精？）唔好咁講，真係要了解一段時間先考慮公開，唔想分手又要解釋。（係咪向孫耀威示威?）唔想拉埋一齊講，依家都係想事業行先。」記者再追問與Ray的戀情時，她即維護男友說：「唔想影響佢，你哋叫佢麥生得嘞。」

楊秀惠和新歡Ray出席莊思敏生日派對，交情非淺。	楊秀惠和Ray親密咬耳仔。	Ray欲行開和朋友聊天，楊秀惠即捉實對方認真難捨難離。

梁政珏疑似翻撻

當晚亦見最近捲入「三角戀」的梁政珏與盛傳分手的男友Eri，日前爆出薛凱琪介入Eri Chu與梁政珏之間導致兩人分手，但成為新一代「咪神」的梁政珏與Eri似乎欲斷難斷。現場所見梁政珏早已到場祝賀壽星女，Eri則於派對尾聲才現身，但他只與梁政珏及大班好友一齊玩樂，直到與梁政珏飲多兩杯，兩人開始自成一角親密互相擁抱，而Eri更輕撫女友玉背及攬腰，似有復合之意。另一邊廂，薛凱琪亦不甘示弱，跟另一個緋聞男友方大同齊齊睇英國樂隊Mamas Gun的演唱會，明顯不愁寂寞。

Ray（左）到賀好友莊思敏（右）生日，場面熱鬧。	梁政珏低胸夜蒲，情緒勁high。	梁政珏在生日派對與Eri抱腰攬頸，極度癡纏。
放大圖片

文、攝:專案組