杜麗莎接凶鈴魂飛魄散
杜麗莎（Teresa）的外籍老公Andreas昨午獨自駕駛七人四驅車，因「跣胎」而猛烈撞向路邊石壆翻側，Teresa連忙「打的」趕往現場了解，嚇至魂飛魄散的她憶述見到老公與她揮手時，感動得淚流滿面，並獲老公咀嘴呵番！
Teresa昨午由澳門趕返港與大女TV Carpio灌錄歌曲，當她搭船返港之際即收到老公Andreas「凶」鈴，指他剛遇上交通意外，亦已第一時間爬出車廂，被嚇至魂飛魄散的Teresa落船即飛撲到事發現場，得知老公沒有大礙才放下心頭大石，並在錄音室與老公及大女齊齊接受訪問。
跣胎撞壆
Teresa詳細轉述老公撞車經過，她說：「佢諗住行西隧過上環接我，當去到圓方附近因為『跣胎』撞咗埋石壆之後就反車，當時佢仲打電話畀我添，嚇到我咩都諗唔到。」Teresa續說：「之後已經有消防員到場，而我就即刻坐的士去搵佢，我借用的士司機電話打畀佢，佢話冇事同爬咗出車喇，去到只係見到架車打側咗，佢就企係一邊同我揮手。」
唔准揸車
由於警方要將座駕拖往檢驗，Teresa說：「架車爛咗冇所謂，最緊要人冇事。」並與老公情深對望，當講到老公只覺小意外時即淚如雨下，她說：「我真係好亂，都唔明佢點解會覺得冇事。」Andreas隨即拍拍Teresa及「咀嘴」示意不要太擔心，Teresa強調短期內不准老公揸車，要求他跟住自己。
文：音樂組