潘裕佳被炒大爆：陸續有嚟

自上月十一日無綫爆發涉貪醜聞後，總經理陳志雲及四名愛將涉貪遭ICAC拘捕，經過一個多月，停薪停職的涉案人物逐漸蒲頭，不過仍在其位的綜藝科監製潘裕佳，卻難逃被裁命運。

幕後被裁第一人

據知，無綫老闆娘方逸華（六嬸）曾就遭ICAC調查的問題節目重新查數，發覺去年在澳門舉行的《翡翠歌星賀台慶》帳目混亂，除受牽連的陳總因而被停職，而且六嬸認為去年潘任監製的《港姐》騷內容不知所謂，故早已埋下伏線。其實今次涉貪案牽連人物眾多，繼張繼聰被停所有演出節目、鄧健泓被飛出《勁歌金曲》及崔建邦復出無期外，潘裕佳可算是幕後首位遭「開刀」之「黨羽」。

潘裕佳昨受訪時坦承大前日接獲通知被裁走，即日離職，被裁理由竟是「唔夠嘢做」，潘忿忿不平謂：「咁祝無綫生意興隆！我曾離開過無綫三次，本身都做到好心淡，炒我冇問題，但理由好牽強！無綫係賺錢機購，監製個個做到嘔，點會冇嘢做？公司既然用個咁冠冕堂皇嘅理由，唔通我同佢拗？公司同我講裁員行動陸續有嚟，好多人都好擔心！」對六嬸指《翡》帳目混亂，潘解釋：「背後條數我就唔知，製作費方面無綫向來有人監管，有高層簽批預算書，所以條數好清晰，反而係underbudget（預算之內）。（清洗「志雲黨」？）咁我都屬於嘅，我受綜藝高級經理陳家揚重用，對方又受陳志雲重用。」潘曾因《翡》協助ICAC調查，但潘稱自此再沒下文。

基仔任「遺作」主角

至於潘最後監製的「遺作」《我的故事．我的歌》將於今晚播出，有份演出的古巨基得悉潘被炒大感愕然：「（志雲黨）關係？唔好太敏感，應該唔關事，（飯局有冇見過佢？）冇見過一齊，不過佢好尊重歌手意見，工作投入，今次合作《我》好愉快，我都好滿意呢個特輯。」

就此事聯絡無綫製作部（非戲劇製作）總監何麗全與無綫外事部副總監曾醒明，但至截稿前都未獲回覆。

文：影視組