馬國明恨咀李詩韻
馬國明懶理緋聞女友胡定欣，公開大讚最鍾意同李詩韻合演情侶，除了直言渴望與詩韻孖住登台搵銀外，又表示希望與對方演夫妻角色，還要加多些咀戲！
李詩韻、馬國明在無綫劇集《鐵馬尋橋》中再度合作，是繼《少年四大名捕》、《太極》、《肥田囍事》、《本草藥王》後，再次飾演一對，雖然屢次合作，但兩人愈拍愈有新鮮感，馬國明更明言要與詩韻成為螢幕情侶，難道不擔心緋聞女友胡定欣呷醋？
個性樂天派
馬國明直言雖然經常與詩韻飾演情侶，不過完全未有悶意：「同詩韻合作好好默契，而且好開心，喺公司唔係個個都可以夾得咁舒服，佢性格樂天，氹得人好開心，記得之前同佢合作《太極》，佢有場喊戲喊唔出，點知佢搵本小說出嚟睇，睇咗幾頁就喺度喊，好搞笑。（係咪想同詩韻做螢幕情侶？）梗係啦，最好就做情侶檔，除咗拍戲可以合唱登台，好想同詩韻演多啲sweet啲嘅兩公婆，若果多啲咀戲更好，不過今次喺《公主嫁到》佢變咗演我表嫂，我都係鍾意演情侶多啲！」
口花好男人
詩韻則笑指馬國明口花花，但也大讚對方好男人，揚言喜歡與相熟男拍感情戲：「佢由拍《本草藥王》已經咁講，成日口花花，不過佢係好男人、好老公、好踏實，佢唔讚我，唔驚我整蠱佢咩。（同馬國明拍劇有冇咩難忘記憶？）今次拍《鐵馬》，同佢有場水底戲，我又唔識游水，超級驚，拍嘅時候啲水入晒鼻，而且又乸眼，入行以來最辛苦，好彩佢傍實我，等我喺水裏冇咁驚。」
文：影視組
場地：EL CID 化妝：Synni Tam（李詩韻）
服裝：Sinequanone（李詩韻） 髮型：Jay@Hair（李詩韻）