健仔被粉絲寸老冇聲出
出名牙尖嘴利的張衞健，昨日與梁漢文、蘇永康及許志安出席簽唱會，吸引數百人捧場。當他們與歌迷玩遊戲時，由於有女歌迷以「La La La」唱出健仔的歌曲《你愛我像誰》，抵死的健仔即叫對方努力讀書，估不到慘被女歌迷反窒他年紀老，搞到健仔鬼咁尷尬冇聲出。
女歌迷先以「你唔係我個年代」窒健仔，然後又指健仔年紀大過自己老竇。當兩人影合照時，洩了氣的健仔更以「孫女」形容女歌迷。兩度被寸的健仔事後笑笑口說：「冇諗過喺度遇上對手，簡直係高手呀！臥虎藏龍。（有冇好傷心？）冇，都唔係第一次畀歌迷寸。」
傳安仔已婚
忙於世界巡迴演唱會的四子透露近日經常入無綫開會：「要為節目開會，估計做八至十集。」健仔坦言嘉賓名單已在手，他說：「都要睇吓對方有冇期，總之有驚喜畀大家。」
另外，本報收到讀者ａ爆料，指安仔與舊愛於九七年在韓國註冊結婚，安仔聽後愕然兼語塞，只說：「唔使理，不用理會！（你係咪已經結咗婚？）冇！」
文：音樂組