鄭中基黯然灑淚宣布離婚
相愛六年的鄭中基（Ronald）與蔡卓妍（阿Sa）戀情一直低調，惟阿Sa每次談及愛郎均甜絲絲晒幸福。但日前阿Sa率先於電影宣傳活動上自爆已分手，隨後被揭原來兩人早於○六年在美國洛杉磯註冊結婚，六年情最終發現不適合對方，最終決定離婚，昨日兩人更大方召開記者會交代事件。
昨日傍晚Ronald與阿Sa於九展七樓的會場舉行記者會，兩人於六時三十分一齊進場，企定定肩並肩在台上讓傳媒拍照兩分鐘。兩人雙手放在背後，神情非常凝重。隨後兩人於發言的長枱前坐好，Ronald拿出一張講稿，表示感謝各大傳媒出席兩人的記者會，然後自揭兩人已婚的關係。
雙方家長支持
Ronald說：「結婚係一個事實，○六年我哋兩個非常之咁開心做呢個決定，得到雙方家長支持下，喺洛杉磯註冊結婚。」他稱兩人一向認為感情及結婚乃屬私人事，無需要亦無必要向大家交代，但由於外界一直猜測及不斷出現失實報道，最終決定一次過交代始末。
Ronald坦言跟阿Sa婚後生活開心，但因雙方逐漸因了解而決定分開：「喺結婚呢幾年，我哋生活非常之開心，呢段時間大家共同成長，對彼此對方更加深入了解，發覺分手係對大家日後係比較好啲嘅，所以最近我哋同大家宣布我哋分手，係好理性之下做出呢個決定，呢個決定亦係一個事實。我再強調一次，我哋嘅分開係冇涉及任何第三者，亦冇涉及一切外間所傳嘅失實嘅報道。」
成為永遠朋友
他續稱雙方有共識下分手，離婚手續亦在處理之中。他說：「我相信離婚亦係大家將會追問嘅問題，呢件事已經處理緊，而所有法律程序要做嘅嘢，我哋都會做，儘管……」當Ronald想開口進一步解釋兩人關係時，即禁不住哽咽說不出話，然後緊合雙唇低下頭、多次托眼鏡，惜仍難忍內心悲痛，流下男兒淚。旁邊的阿Sa見狀，即伸手拍一拍他予以安慰。
經過半分鐘的哽咽，Ronald邊喊邊說：「儘管我哋唔能夠成為夫妻，但我哋（再度哽咽）的而且確有過一段好開心嘅時間。（此時Ronald托一下眼鏡）以後我哋可以成為永遠嘅朋友（除下眼鏡用紙巾抹眼淚）。好多謝大家同希望大家可以畀些少空間我哋，多謝！」Ronald語畢再次除眼鏡，多次用紙巾抹眼淚。
中基工作如常
另外，Ronald於昨午四時許乘白色保母車由淺水灣住宅，直驅位於尖東的唱片公司，滿臉鬚根的他一臉憔悴，但未有迴避鏡頭，問他秘密結婚一事，他說：「一陣九展見，依家上公司傾啲嘢。」約六時，他乘車直奔九展。記者會後，兩人分別乘車返回淺水灣、跑馬地住所。而Ronald今晨會飛往四川成都出席Channel[V]舉行的「全球華語榜暨亞洲影響力大典」，金牌大風CEO陳輝虹表示Ronald會如常工作，一切未有變動。
文：音樂組