張曼玉轉玩唱作網羅fans
國際影星張曼玉前晚現身香港，出席時尚品牌JOYCE舉辦的慈善活動，春風滿面的曼玉被問到何時與德國籍建築師男友Ole Scheeren拉埋天窗，她表示暫時未有意欲再披嫁衣。
JOYCE前晚為聯合國兒童基金會（UNICEF）籌款舉行的慈善活動，邀請了城中充滿衣着品味的人士如：黃耀明、謝婷婷、蘇永康、楊千嬅、徐濠縈、小美、周顯揚等出席，更邀得已有一段時間沒在港露面的張曼玉光臨，欣賞由著名國際品牌Rodarte設計師Kate及Laura Mulleavy，取材自曼玉電影作品《花樣年華》、《英雄》、《錯過又如何》及《東方三俠》設計而成的四套新裝，曼玉對採用了大量SWAROVSKI ELEMENTSTM的華衣讚不絕口。
曼玉說：「今次留港四、五日，冇特別計劃做乜，探吓朋友，男友長駐北京工作，我間中都有返香港，只係冇出席公開活動。之前喺歐洲出席影展、時裝騷，好攰。（享受拍拖，暫不拍戲？）再睇啦，我冇離開過電影，近排迷上音樂創作，作曲、作詞，仲唱埋，作品唔多，玩吓啫，但就後悔細個冇學樂器，好開心有班音樂朋友唔計較人工，鼓勵我從事音樂創作。」
享受做音樂
曼玉又稱最怕接受訪問，她說：「拍戲好辛苦，最怕拍完做訪問宣傳，都唔係我專長，我依家好享受做音樂，同朋友lalala就作到首歌，填到好詞好有成就感，（幾時出碟？）未諗到咁長遠，可能放上網畀人下載。（男友點評你作品？）佢話OK，有鼓勵我。（男友求婚未？）冇，拍拖唔一定即刻講結婚，我都結過婚啦，我有好多嘢想做，想結咪結，但暫時未有計劃。」
千嬅撐老公
同場有幸福少奶奶楊千嬅，但其有份擔任活動公關的老公丁子高即隱身，千嬅說：「梗係，老婆萬歲！唔通雙CD單碟價（意指夫妻檔工作）！四月我去非洲探訪，要打五支防疫針。（老公都去非洲？）佢好多嘢做，我話畀贈券佢睇《志明與春嬌》，佢話要嗌埋班friend買飛支持，佢睇戲好多批評，我唔嬲，仲好鍾意，有道理會聽。」
徐濠縈則高呼萬分期待老公陳奕迅個唱，她說：「今次我冇幫手搞服飾，個唱內容乜都唔知，好期待。」
文：影視組