靚靚唔想做Chi Lam搏命搵
袁詠儀（靚靚）與張智霖（Chi Lam）以夫妻檔合作搵銀，Chi Lam自言不懂「氹死人」，但承諾會勤力搵錢養家，靚靚即得戚表示，今年願望係唔使做。
靚靚、Chi Lam與高圓圓昨日出席鑽飾品牌Forevermark活動。張氏伉儷婚後首次以夫妻檔姿態合作，靚靚直言收入可觀，二人台上不忘鬥嘴耍花槍，Chi Lam更打趣指早前拍下的廣告照，令他們重溫恩愛感覺：「喺屋企冇乜兩嘴，呢次係個好回憶，（廣告商）真係功德無量嘞。」語畢全場笑爆。
事後二人雙雙接受訪問，Chi Lam坦言自己並不是甜嘴一族：「不嬲都係直話直說。（唔驚老婆嬲？）佢成日都好嬲架。」在旁的靚靚即替他講好話：「咁好多時佢講嘅都係事實。（Chi Lam成日送鑽石畀你？）都有十次八次，最大粒有兩卡，佢唔肯再送大粒啲，因為咁貴佢寧願買架車畀我。」而今年將開個唱及稍後北上接拍王家衛新片《一代宗師》的Chi Lam，台上承諾會肩負搵錢重擔，難怪靚靚得戚表示：「我今年嘅願望係唔使做。」
高圓圓認蜜運
眼見Chi Lam與靚靚十分恩愛，隻身來港的高圓圓自言羨慕不已。素來不愛向媒體透露感情狀況的她，經記者追問才透露已有男友，但當問到有否計劃結婚時，她即封嘴謂：「不要問些連我也不清楚的問題吧。」至於與內地導演王小帥十多年的交情，今次更合作拍廣告，問她可有機會發展？圓圓斬釘截鐵謂：「我想不太可能吧。」今次來港她會順道出席下周的亞洲電影節，屆時會公布她接拍新片的事宜。
文：影視組