娛圈敵友有插有撐
陳志雲接連開記招及到港大出席講座，連續第二日高調見人，娛圈中人對此各抒己見，有謾罵亦有支持！
薛家燕：
「佢早前都有SMS我，話本來準備兩首歌同我賀壽，最終嚟唔到好慚愧，有好多同事都託我問候志雲，（包括樂易玲、曾勵珍？）咁又冇。佢開記招係想話畀大家知佢冇避見任何人。會上佢好得體、感性，講到人生會遇變化，既話緊佢自己，亦指引緊其他人。『真的、假的』嗰句可能有含意，但現階段唔方便講。」
袁彌明：
「佢（陳志雲）開完記招，又搞講座真係好唔正常，講乜啫！佢簡直係曝光狂，畀人拉正常係應該低調，真係唔明佢諗乜！不過佢嘅金句真係幾金，講完等於冇講。」
陸詩韻：
「我有睇過陳志雲記者會，佢開記招嘅地方喺我爹哋公司附近，起初唔知乜事，後來先知。（點睇？）佢表現得好大方，好寬容，佢只係用咗五分鐘就表達到佢想講嘅嘢，亦不忘幽默一下！（熟唔熟？）以前選港姐熟啲，後來只會公司活動見到。（同錢國偉及叢培崑熟唔熟？）同錢國偉做上年港姐節目出過埠。」她坦言至今沒有人找她協助調查，並說：「我覺得我哋後輩要向佢（陳志雲）學習應對大方，希望件事快啲過。」
