去年憑搞笑「牛耕圖」展開新一頁的李曼筠（動漫Maggie），今年再與動物結緣，愛心爆棚的Maggie為了迎接虎年，專程走上番禺拜會老虎仔，實行再次測試與動物的緣分指數！
【袁霆番禺直擊】牛年第一天便遭新界黃牛媽耍得團團轉的Maggie，今次面對的雖然是體積小得多的老虎仔，但卻一樣冇晒符；雖然身穿低胸衫的Maggie已冒走光之險俯身與老虎仔作親密接觸，不過老虎仔不但唔領情，還「阿崩叫狗」般愈叫愈走，弄得Maggie異常尷尬。
收拾殘局
為了收拾殘局，Maggie惟有施硬功將老虎仔抱入懷中，不過老虎仔們依然不為所動，除了全程頭耷耷外，還不斷在Maggie玉腿上「攀爬」，弄得Maggie連連叫痛。
母愛氾濫
在無計可施的情況下，Maggie惟有聽從在場工作人員指示，餵老虎仔喝奶！正所謂「雞髀打人牙骹軟」，在有食物果腹的情況下，老虎仔即時顯得極為溫馴，除乖乖讓Maggie抱着拍照外，亦再沒有「郁身郁勢」，令母愛氾濫的Maggie忍不住大叫：「佢好乖呀！可唔可以帶佢返屋企呀？（追番個老虎仔囉！）人哋連男朋友都未有呀！好衰㗎！舊年探完新界牛牛之後事業發展都唔錯，起碼減肥成功先啦！希望今年老虎仔都可以帶好運畀我啦！」
場地：廣州香江野生動物世界