影壇新貴Baby今年新年檔連上兩片《花田囍事2010》及《全城熱戀熱辣辣》，風頭一時無兩，面對連串電影宣傳，Baby可謂有氣冇得抖，更令原本已瘦蜢蜢的身軀更變得如紙般單薄，幸而Baby卻樂在其中。屬貪靚一族的她，於《全》片卻自我挑戰，扮演工廠妹，還大膽得不施脂粉上陣，她說：「本來導演叫我除大眼仔畀佢睇，後來我都係戴住拍，因為有近視嘛!」

井柏然奪銀幕初吻

而片中Baby有一場與內地演員井柏然的蜻蜓點水式親吻戲，此乃其螢幕初吻，更是導演臨時加插，Baby笑指拍攝時並不緊張，只拍了三次便收貨，還表示若日後被要求拍攝激咀戲，只要劇情需要及清楚對手便接受。問到若對手是William會否接受？她笑道：「有冇新鮮啲㗎？（因為咀過？）唔係，我冇講過，傳緋聞咁耐都悶，如果導演有好劇本都冇辦法，最好唔好囉，畀我揀就揀木村，佢係我偶像。」

12歲初戀非William

去年模特兒及電影工作齊飛，Baby不諱言拍戲對她來說感覺新鮮，自言非行天橋的模特兒，故不會視之為終身職業，但拍戲則可以長久，對於被取笑喜歡新鮮感，豈不是花心女孩一名？對此Baby說：「唔係，我對感情十分專一。（有傳William嘅初戀係你喎？）一定唔係，我初戀發生喺12歲，係一個上海男仔，大家只去過兩次街同拖過一次手就完咗啦!」

文:影視組

髮型：Carr Cheng @ P.O.P. Hairdressing　　

化妝：Will Wong　　

服裝：Vivienne Tam　　

場地：W Hotel