陶前晚於會展舉行演唱會，慘遭緋聞女友岑潔儀高調踩場，被利用的陶趁機借歌曲《關於陶》作反擊，Rap住唱出「其實我是真的那麼傻傻被人家設計」寸爆對方設陷阱及博宣傳。
一連兩場《陶喆上太空說演唱會》前晚於會展開鑼，吸引陳柏宇、RubberBand的泥鯭及新人王梓軒捧場，曾被拍得與陶喆在酒店門口「啜爆」的岑潔儀（Zoey）與女性友人高調出現，即成為焦點，由於吸引不少傳媒拍照，坐在其身旁的觀眾表現得相當煩躁，甚至用手遮住自己塊面。
冧女零反應
陶喆出場即出冧招說：「香港姑娘我愛你。」可惜全場觀眾零反應，陶喆無奈說：「係咪啱啱收工？辛苦你哋。」多次被拍得與女伴夜蒲的陶喆即場揀了一位女歌迷上台，又拖、又攬、又摸女歌迷面唱冧歌，最後來個情深擁抱。緋聞纏身的陶喆表示作為藝人一定要有幽默感：「每日都有好多八卦新聞寫自己，唔可以太認真，但是我很討厭狗仔。」陶喆更憑歌寄意經常遭女伴出賣，唱到新歌《關於陶喆》歌詞「不要羨慕我跟那麼多的辣妹拍拖、其實我是真的那麼傻傻被人家設計」時，全場起哄，接住又表示要將新歌《你的歌》送給梅艷芳。
隊香檳解悶
預先張揚會買飛捧場的Zoey主動接受訪問，有備而戰的她滔滔不絕，先自爆有傳短訊給陶喆：「叫佢加油，同埋話我會嚟睇，佢冇覆我。」咬住陶喆不放的Zoey表示門票是幕後人員給她：「最後都冇買飛，係幕後朋友畀飛我。」曾以「博愛」形容陶喆的她，問到會否入後台再重演「啜爆」一幕以示支持？Zoey說：「唔夠膽，好驚再畀人影到。（怕唔怕畀人話你博宣傳？）怕呀，今日嚟睇騷，冇諗過做訪問。」Zoey完騷即與好友到銅鑼灣「劈酒」解「𤓓」味，見她悶悶不樂開了一支香檳自隊，接住又轉戰「唱Ｋ」。
文：音樂組