本文重點
張衞健與張茜去年一月十二日於菲律賓拉埋天窗，不少兄弟遠赴當地祝賀。事隔一年，健仔忙於籌備跟許志安、蘇永康及梁漢文的「BIG FOUR」演唱會，而太太張茜非常識做，特別遠道來港跟老公慶祝一周年紀念。
日前健仔百忙中抽空，與老婆恩愛到銅鑼灣利園翹手行街街，逛盡LV、Chanel、Dior等各大名店。其中孭住Chanel手袋的張茜似乎對該品牌情有獨鍾，試完太陽眼鏡再試手袋，非常雀躍，可惜忙爆的健仔被連環追魂call，不時拎起手提傾電話，難掩倦容的他不想老婆擔心，經常偷偷背妻打「喊露」。
大細路買玩具
事後，兩人前往時代廣場方向繼續行街，急需醫肚的健仔途經小食檔時大買特買，跟張茜邊食邊行，更互相餵對方，旁若無人。期間，張茜被一間玩具店的星球系列玩具吸引住，兩個「大細路」對新款玩具都愛不釋手玩餐飽，在老闆娘熱情招呼下買了一個價值一百二十八元的電動玩具，未知是否為「造人」計劃做好準備。
雖然健仔跟張茜結婚不足一年就傳出婚變消息，但今次兩人甜甜蜜蜜遊走鬧市，相信婚變傳聞會不攻自破。
文：音樂組