古巨基在主持《係咪小兒科》節目中以古Sir身份出題考嘉賓，愛講爛Gag的古Sir今次就被本報反考，估不到不需五秒就答中，還抵死即場以同一答案創作另一爛Gag題，而斯文有禮的方大同亦很快答到，反而蔡卓妍要搵人求救「提水」，認真失威，當知道答案時即哈哈大笑。今次題目係：點睇一個人係基？
蔡卓妍聽完題目即眉頭深鎖反問：「估咩？」思考近半分鐘再問：「有冇貼士？」隨即四周搵人求救，並哈哈笑：「一定係有個基字嘅人，就係古巨基。（條題目夠唔夠爛？）爛呀！平時好少睇爛Gag書，都係靠聽朋友講時記住。」
方大同胸有成竹答：「係咪李準基？」當記者表示只猜中一個字，大同極快說：「古巨基。（解釋個答案？）估佢係基囉。（玩過？）唔係。」問到題目是否很爛？大同坦言爛到唔識笑：「個答案唔夠似。」自認是爛Gag一族的他透露其所創的爛Gag全是發自內心。
古巨基聽到問題即答中：「我照鏡就會知道，係咪古巨基呢？」問到是否玩過此題目？基仔笑說：「咁有創意，呢啲考我唔到。」隨即自創一番：「等我負責作番個問題啦，就係去健身室做Gym，淨係做Pat Pat，個答案都係古巨基。」
答案：古巨基（估佢係基）