廖碧兒、林峯及馬德鐘老友鬼鬼，加上屬同一位經理人，私底下Friend過打Band。三人更已約定於今個聖誕節大搞狂歡派對，並率先到酒店擦聖誕大餐「熱身」，商討派對細節。
碧兒、阿峯及德鐘平日工作繁忙，甚少時間聚在一起，不過在一年一度的聖誕節，三人亦打算開P普天同慶，日前他們就相約食聖誕大餐，順道為派對作準備。
兩位男士甫一到場即拿起餐牌研究，不過職員表示聖誕餐牌尚未推出，令二人大感失望。大廚為免他們掃興，最後為三人炮製聖誕餐，令他們興奮不已，更拿起配菜整鬼整馬自娛。
喪擦生蠔
身為「朱古力癡」的碧兒，為獨霸朱古力木頭蛋糕，竟出茅招以手沾蛋糕吃，兩男為免食她口水尾，惟有將蛋糕拱手相讓，轉戰喪擦生蠔。其後二人更一同整蠱碧兒，硬把蟹殼擠向她口中，奈何碧兒齋吃蛋糕已經飽晒，根本吃不下其他東西，故不斷反抗，三人儼如大細路般玩不停，場面惹笑。
榮升阿姨
碧兒表示今年聖誕對她來說非常有意義，因其姊姊的BB預計於聖誕節當日出生，她即將榮升阿姨：「好期待，之前去美國工作，仲買好多BB嘢畀佢，好似個BB係我咁。我最驚係家姐個B唔喺聖誕當日或之前出世，因為我26日就要返內地開工，所以希望可以趕得切睇到啦！」而德鐘就表示：「以前會扮聖誕老人畀個仔睇，依家個仔大就會送禮物畀佢，今年已預先送咗個電子結他，太太當然都有。」
文：影視組 攝：馬永堅