William和Baby的分手傳聞擾攘多時，隨着Baby於前日在blog上驚爆「該失去的始終都會失去」，令人猜測兩人的戀情畫上休止符。昨日William出席「飛躍校園2009」活動，全程強顏歡笑，問有冇睇Baby的blog？他說：「冇，唔睇唔代表唔支持，已經冇睇一年，一嚟好少上網，二嚟佢update啲料都唔夠報紙快。」

「身不由己」

對於Baby發表的「失去論」，問失去的是否指William？他推搪說：「佢失去啲乜，大家問佢，而唔係問我，我唔知佢失去乜。（佢話要大個女？）咁都好，當然希望佢大個女，人始終要大，佢失去乜唔想作任何猜測，唔想件事好似泥足深陷。」

William亦指自己大個仔了，問他有冇失去甚麼？William黯然說：「應該失去都失去，我都失去咗好多休息時間。（愛情呢？）其實……失去咗個情，可以講係人情，對人之間所有嘢，呢幾個月冇時間理，專注事業，所有同人相處都冇理會，放低晒。（包括愛情？）唔想講，有時事業好忙時，身不由己，想理都理唔到。（係咪分手？）由頭到尾都係朋友。（Baby話你哋由好朋友變普通朋友？）自己諗法唔知同佢係咪一樣，我哋朋友關係冇變，可能用詞唔同，自己唔敢講咁多。」

講分手好難

至於Baby接受有線訪問，直認曾拍過三次拖，還暗示和William已分手：「依家係休息期，因為工作太忙，冇時間拍拖。（同William分手？）一直都係朋友之嘛。（分手好痛苦？）講分手真係好困難。」

採訪：音樂組