不少藝人對於陳鴻烈突然離世均表震驚，後輩大讚他為人和藹可親，乃一位非常好的前輩，可謂良師益友。當中陳茵媺更邊講邊灑淚，可見烈哥生前人緣甚佳。
陳茵媺：好難過，歐錦棠打電話通知我，大家一齊喊，好唔開心嘅事，佢係一個好開心嘅前輩，佢成日話我哋似樣，好似一家人咁，我以公公稱呼佢，佢話每日開心，人都會靚啲。
胡杏兒傷心
胡杏兒：同佢喺《西廂奇緣》合作過，佢演我爹哋，對佢離世感到突然、好傷心，佢係好前輩，好錫後輩，不過人生就係咁，希望佢家人節哀順變。
陳敏之：合作過《胭脂水粉》，不過對手戲唔多，佢成日都會搭住我膊頭讚我靚女，對佢離世好震驚，接受唔到，冇諗過佢咁後生就咁突然，真係好可惜。
王祖藍：佢不嬲都幾精神幾健康，唔係呀嘛？佢身體好好㗎喎，份人不嬲好好中氣同好搞笑，我台慶當晚見到佢都冇事。佢仲成日叫我要用心做喜劇，仲話搞笑都要有心。
鍾嘉欣：佢喺《珠光寶氣》做爺爺，好熟，我知佢身體好壯，成日講笑。我仲成日問佢點解咁壯，我台慶仲同佢一齊跳舞，無論好壞嘅新聞都會鼓勵我。
毛舜筠激動
毛舜筠：今日我唯一一日冇開《畢打》，我日日都同烈哥有對手戲，你（指記者）唔好嚇我呀！我聽唔到，我唔想聽呢啲嘢！（好激動）你唔好同我講住，我聽唔到呢啲嘢，我會好緊張、好驚……
Lavina：一個月前同烈哥合作拍廣告，當時佢仲好精神，人生真係無常，好難過，拍攝時候佢教咗我哋好多嘢。