祖兒、Eason、蔡卓妍（阿Sa）、方大同、張敬軒、陳柏宇等一眾香港歌手前晚獲邀到北京出席「第九屆全球華語歌曲排行榜頒獎禮」。雖然當地正值嚴寒，女歌手們仍抵冷貪瀟灑，以靚靚晚裝出場，其中祖兒以FENDI全黑連身裙上陣，露出心口抗寒風，認真勇氣可嘉，相反Eason厚身西裝外披大褸，加上雪靴上陣，十足一個黑色雪人。Eason笑言：「我原本係諗住着皮鞋，不過因為天氣太凍搞到縮水，咪惟有着對雪靴上台囉！」

祖兒與好姊妹阿Sa齊齊威到去北京。	Eason披上大褸，腳穿雪靴，十足一個黑色雪人。	張靚穎歌聲動人，奪地區傑出歌手獎可謂實至名歸。

珍惜每次舞台演出

Eason及祖兒齊齊勇奪最佳男、女歌手大獎，為港爭光，而Eason更獲得「最佳專輯」、「最受歡迎歌手五強」及金曲獎，跟方大同一樣各得四個大獎，而祖兒亦得到「最受歡迎女歌手五強」及憑歌曲《與蝶共眠》得到「最受歡迎20大金曲」，可喜可賀。

對於屢獲大獎，祖兒說：「每次得獎都係好大嘅鼓舞，人愈大就會愈珍惜每次舞台演出。（有冇諗過退休？）冇諗過喎，不過有時做嘢做到好攰好down，就想放棄，不過當你同鍾意嘅人一齊做嘢，你會得到好多滿足感。」

阿Sa生日驚喜頻頻

阿Sa首次以個人身份領獎，在台上致謝時感觸良多，她說：「今次係我第一次以個人身份得獎，真係好開心，希望好快會同阿嬌（鍾欣桐）一齊以Twins身份企喺台上得獎。」本月廿二日生日的阿Sa更大爆阿嬌一星期前已經每日送她驚喜，令她又開心又感動。　

文：音樂組