台慶視帝大熱「柴九」黎耀祥昨日出席模特兒公司開幕活動，獲高層陳志雲全程傍實，即被指攞硬獎，祥仔對此笑不攏嘴，他稱視得獎如中六合彩，雖然非常恨，但落空亦不會影響心情。
「大紅大紫模特兒公司」昨日舉行開幕記招，宣布希望將旗下藝人帶到本地以及亞太地區不同的媒體上，包括在電視廣告、電視劇、時裝表演、電影及推廣活動等。昨日祥仔、李珊珊、黃伊汶、陳志雲、崔建邦及鄧健泓等現身撐場；容祖兒、李克勤、郭書瑤及周麗淇等則自錄短片支持。
記緊醫肚
視帝大熱祥仔一早到場，獲陳總全程傍實，陳總更擔心祥仔未有進食，特別叫他記緊「醫肚」，可謂照顧有加。備受「寵幸」的祥仔，問到是否陳總以行動支持他奪視帝獎項時，祥仔笑謂：「好多人企佢身邊，我叨佢光啫！（有冇打動你簽合約？）佢都冇同我講過，又唔係佢負責嘅部分，咁演員同公司都有自己立場，唔係邊個開口問題。」
台慶將至，陳總與祥仔如孖公仔般出席活動似乎有點敏感，陳總對此謂：「香港有幾大？（係咪睇好祥仔？）咁佢一向都好好，舊年又攞獎。我都搵咗佢幫我錄頒獎禮歷史，等我剪輯完就放上blog。（如果唔係祥仔攞，擔唔擔心畀人掟雞蛋？）我每日都食蛋嘅。（係咪會順應民意？）我呼籲觀眾對支持嘅偶像或演員投票，同埋想講經理人合約唔係攞獎主要因素，往年好似蔡少芬、歐陽震華都唔係啦！」
全無壓力
問祥仔會否進行拉票時，他稱已不斷進行中，更謂：「我又冇咩壓力，覺得好似中六合彩咁，好恨，但又覺得自己未必中，所以就當係一個bonus，中就開心，唔中又冇咩影響，不過我就睇好陳豪。」
文：影視組