鄧萃雯成為今年視后大熱，對馬浚偉撐柴九（黎耀祥）若贏不出視帝將「要人死」宣言，贏面大的雯女心情大靚，有信心「冇人要死」，看來雯女「贏硬」視后。
雯女和黎耀祥憑電視劇《巾幗梟雄》成為今年視后視帝「超熱人選」，而昨日雯女聯同方力申（Alex）、吳雨霏（Kary）、農夫、鄧紫棋等出席電台活動，期間連農夫都稱要投「四奶奶」雯女和柴九一票。對她被視為超大熱，雯女表示看淡勝負是健康之道。講到對手佘詩曼置裝迎戰？雯女表示：「唔好講戰，大家都想扮靚。」
贏開心輸淒美
提到馬浚偉笑言若柴九都輸，很多人要死？雯女笑言：「咁嚴重。（咁你輸咗其他人都一樣死？）唔使！」記者笑言因為冇可能發生，雯女竟衝口而出說：「咪係！」說畢記者們狂笑，雯女才醒覺失言：「我意思係冇可能發生會有人死咋。」更多番叮囑記者不要誤會，她只是聽錯問題。講到若雯女大熱倒灶，贏視后的人必被網迷狂轟？雯女表示：「今年個局面係大家都好錫我，攞到係大家開心，攞唔到都好淒美，兩個結局都唔錯，對我係雙贏局面。」
約Wyman揀衫
而雯女約四點半駕車離開廣播道，隨即前往中環會合好友Wyman（黃偉文），在置地廣場的Stella McCartney內，Wyman為雯女挑選多款服飾，有性感粉色透視裝又有中性西裝Look，雯女在試身室不停試衫，最後成功掃了三袋戰利品滿意離開。
另外，Alex被問到側田與傳媒爭拗一事會幫哪一方時，Alex即一臉難為地說是「一場誤會」，講到側田打交不開記者會，與傳媒爭拗卻開記者會澄清？Alex無奈說：「係咩……咁要問陳輝虹啦！」
文：音樂組