咬住金鎖匙出世嘅林峯，生得高大靚仔，真係超筍盤。入行咁耐緋聞又唔多，近年傳來傳去都係只得鍾嘉欣。但近期突然爆出嘉欣情投武打奀星伍允龍，而蒙在鼓裏嘅林峯事後亦表現酸溜溜。
愛情失意，惟有寄情工作！林峯自從簽約英皇做歌手後，人氣可謂有增無減，遲啲仲會喺馬來西亞舉行音樂會添！日前晚上八點幾，八太喺中環ifc見到啱啱做完嘢嘅林峯，同經理人及化妝師準備離開商場，但當行經附近勞力士專門店時，林峯即停低在櫥窗前研究名錶，仲睇得相當入神，眼都唔眨，同經理人商量咗一陣就轉身走人。沿途經過珠寶店BVLGARI，林峯繼續目及櫥窗內的鑽石首飾，唔知係咪想買畀意中人呢？不過佢家住半山，出入名車代步濕濕碎啦！
