鍾意夜蒲嘅唐貝詩，一個星期起碼有四日都喺中環蘭桂坊。上次佢同王友良一齊蒲時，唔小心差錯腳成個冬瓜咁仆落斜路。八太都唔明佢一星期行呢條斜路咁多次，都可以咁唔小心。

拖實男友人

早幾日八太又撞到唐貝詩同對情侶朋友蒲蘭桂坊，不過今次佢醒喇，男朋友Eric Yu唔喺身邊，落斜路時佢都拿拿聲拖住個男友人，起碼「有乜依郁，揸住碌竹」！男友人亦好有風度，右手拖女朋友，左手就拖住唐貝詩，但一王兩后嘅畫面維持到斜路轉角位時已消失，男友人「不勝負荷」，右手拖住嘅女友突然跣腳，「嘭」一聲成個人撻生魚咁撻咗落地，但係企喺隔籬嘅唐貝詩，竟然郁都唔郁袖手旁觀，未有即時扶起人都算喇，之後「不顧而去」，仲要掩住半邊嘴笑笑口將人哋仆倒嘅過程，一五一十爆晒畀另一男友人知，唐貝詩爆料時個樣愈講愈肉緊，仲揸實拳頭咁報告事發經過。

驚死跌倒 搵仔拖實 唐貝詩懶理男友人已拖實女朋友，要求對方拖埋佢。	友人跌倒 袖手旁觀	未有慰問 轉身走人

爆料表情誇

唐貝詩爆起料上嚟個樣真係七情上面，直情八過我八太幾十倍！諗諗吓，八太終於明白點解唐貝詩之前同何超盈咁老友，成日一齊孖住夜蒲，但最後超盈都係疏遠佢。