日前本報獨家拍得貝安琪及尹子維在萬聖節派對中公然激咀，事後貝安琪矢口否認，尹子維卻大方承認有錫過，但就堅決否認撻着。不過，貝母劉香萍卻踢爆兩人咀後另有下場，齊返女方香閨。
前晚記者致電貝安琪（Ankie），電話由貝母劉香萍接聽，當被問到女兒激咀之事，劉香萍即以「兄妹」來形容尹子維及貝安琪的關係。
劉香萍爆齊返歸
她說：「Terence（尹子維）人品好，佢做埋護花使者，送我女返屋企。我聽到個女仲喺門口同佢講：『送到呢度得嘞，阿媽喺度，唔使再入嚟！』（係咪因為你喺度唔敢入屋？）唔係，Terence只係保護佢送佢返嚟。」
之後，劉香萍把電話交給Ankie，甫聽到激咀一事，Ankie即大笑了五、六秒才說：「我哋係朋友。（笑得咁開心，即係承認有咀？）完全冇。（係咪飲醉唔記得錫過？）冇，我好清醒。（有人真係見到！）唔係呀，咁……又有咩問題。」此時Ankie即把電話交給母親，劉香萍解圍道：「佢廣東話唔叻，聽唔明你問乜。」
直至昨天圖片見報後，記者再致電Ankie，接聽的劉香萍說女兒不在身邊，再次否認兩人激咀：「係咪角度問題？我都在場，唔通我走咗之後就有咁多轉變？」她續說雖然平時很少見女兒這樣咀，但親面頰在歐洲來說好平常：「Ankie冇講過同Terence拍拖，我要問佢。（滿意Terence做男友嗎？）佢人好好，有上進心，揀男仔唔計較有冇錢或係咪靚仔。」
否認與楊淇有情
雖然Ankie不認，但Terence卻大方承認有錫過，更稱歡迎隨時致電他求證。他說：「我冇講大話，我哋係互相尊重嘅朋友，一向我當佢係妹妹，你哋影到嗰時係活動尾聲，因為我係搞手，嗰時可以relax啲，我係錫咗佢一啖，唔係你哋諗到咁。」
至於有傳楊淇也是女友，Terence即斬釘截鐵說：「No，係有聯絡，係好朋友，由始至終都冇拍拖。我依家集中火力做幕前，會同焦媛返內地四個地方走埠演出，拍拖要時間精神，如果冇時間情願唔拍。」
文：名人組、影視組