英皇娛樂為慶祝公司成立十周年及歡迎孫楠加入大家庭，昨日逾三十位紅星藝人，包括謝霆鋒、容祖兒、古巨基、Twins、黃耀明、陳偉霆、大陸女星白冰等，雲集老闆楊受成的淺水灣豪宅，舉行加盟記者會及影大合照，喜事成雙。
相信霆鋒為賀公司大日子，由日前否認太太張栢芝有孕，昨日改口默認謂：「坦白講，女性身體有變化係真㗎，但我唔會刻意去check，未講得，我肯定就講，（唔去睇醫生？）佢都係啱啱身體有變化。」令昨日又添一件喜事，好事成三！霆鋒說栢芝的目標是生夠五個，現時栢芝不再接工作，只專心做媽咪。
踢拖瀟灑壓軸
雖有傳霆鋒將離巢，但昨日所見，他仍穩站一哥地位，當盛裝出席的眾星排好陣勢等影相時，戴黑超、身穿露臍白恤衫、牛仔褲及踢LV拖鞋的霆鋒，才以瀟灑姿態埋位，更一個箭步企在英皇訂造的巨型王冠前，要勞煩英皇高層霍汶希（Mani）出手幫霆鋒「移位」到孫楠身邊。正式埋位時，Mani「號令」眾星「笑多啲」，但霆鋒的笑容激到Mani點名叫霆鋒：「謝生，唔好陰笑呀！」認真搞笑。玩開有癮的霆鋒曾兩度自行「離隊」，又要Mani出馬着霆鋒行好，令現場瀰漫住「玩味」。老闆楊受成到場影「晒冷」相時，霆鋒更被安排站在老闆旁邊，明顯得寵。事後，被嘲穿得「樣衰」的霆鋒笑言已花了半小時回家換衫「盡執」，由黑tee換白恤衫。有傳他將自組公司？霆鋒謂跟英皇尚有兩年合約，傾續約要問老闆，但自問現時在英皇自由度亦不少。
四哥厭煩cut線
昨日記者曾聯絡栢芝的經理人周小姐求證，她說：「吓？未聽聞過，阿仔（霆鋒）係咪講笑？」但據知鋒芝獲悉成功造人後，歡喜萬分，但因「唔講得住」，故霆鋒連經理人、助手及密友都三緘其口。而謝賢昨日收到記者來電就煩厭說：「我唔知呀。」說罷即收線。而謝母狄波拉的電話則飛到留言信箱。栢芝好友郭偉亮稱對此事不知情，但若栢芝真的有喜，三、四個月後自會揭曉。
文：音樂組