趙碩之（Wylie）於新片《關人7事》中飾演女同性戀者，深愛着鄭融，更不惜為了跟陳偉霆（William）「爭女」而爆粗，Wylie說：「嗰場戲我突然間好激動，不期然爆咗粗，全場都有啲愕然，好在導演好欣賞，仲話效果好好，所以出街嘅版本都唔會剪。（驚唔驚畀人話你搶鏡？）唔會，佢哋個個都有發揮嘅地方。」

生兒育女直接拒愛

談到戲中飾演女同性戀者，Wylie坦言對此身份不太陌生，因自小喜歡運動，在學校曾是風頭躉，被不少學妹暗戀，她說：「經常都有人向我示愛，（用咩方法？）打吓電話，跟我加入銀樂隊咁囉！（會唔會潛移默化接受女仔？）咁多年都習慣咗，有免疫力，我唔會受到影響，因為我覺得兩個女仔生唔到仔，唔會係圓滿嘅關係，我要生兒育女㗎！」Wylie表示清楚自己想法，故遇見有女性示愛會直接拒絕，以免浪費別人時間。

處女拍戲唔識抽離

《關人7事》於去年開鏡，算是Wylie入行後第一次參與電影演出，她說：「我好鍾意呢部戲，每個人嘅角色都有自己個性，都有獸性嘅一面，加上我自己第一次拍戲，當時每日都要keep住『好憎William』嘅心態，有啲唔係好識抽離添。」她坦言要過一段時間才將憎恨的感覺抹走。

文：影視組