讀書時期的劉家豪，對話劇已有濃厚興趣，在「我的志願」中曾寫下當戲院帶位員的願望，一九七五年畢業後進身麗的電視擔任畫片控制員，八個月後轉做助理編導與名監製麥當雄合作，至一九八六年過檔無綫，八七年晉升監製，炮製過不少炙手可熱的劇集，包括《蓋世豪俠》、《他來自江湖》、《大家族》、《溏心風暴》系列等，而《溏心》系列更創出五十點收視的本地劇集紀錄。

劉家豪入行三十年，創造過不少收視奇迹。

劉家豪覺得睇司棋姐係享受、睇菊姐係驚喜、睇夏雨係舒服。

大細契誕生

當年劉家豪破格找來仍是新人的周星馳擔正演出《蓋世豪俠》及《他來自江湖》，令周星馳一鳴驚人，可見劉家豪獨具慧眼。直至○七年，劉家豪大膽找來李司棋、夏雨、關菊英、米雪擔正演出《溏心風暴》，掀起「老旦」熱潮，他說：「當時設計咗『大契』角色，首選就搵司棋姐，咁啱當時佢七年冇拍劇，正值七年之癢，大家一拍即合。其後就諗『細契』一角，呢個角色要好有媚態，咁啱喺電視見到回流嘅菊姐，仲係咁靚咁有新鮮感，於是大細契就咁誕生咗。（有冇諗過《溏心》成績咁好？）冇諗過，初初以為係得得地，冇諗過係咁得。」

在現今小生、花旦之中，劉家豪睇好林峯與楊怡會更上一層樓，他說：「超級睇好林峯，因為佢觀眾緣好好，好似喺《溏心》佢演一個用情不專嘅男人，但係觀眾對佢依然支持，如果一般演員去演，可能已經畀人彈，而楊怡就一部比一部戲演得好，佢嘅喊戲好出色，好多演員會顧住喊、啲對白講得唔清楚，不過楊怡喺《家好》喊得好好。」

文：影視組