【林淑汶澳門直擊】昨日陳淑蘭捧好友鄧達智場，出席澳門時裝表演。對於近日有關FEVAR Club的股東意見，蘭子表現得有口難言，但仍句句「夭心夭肺」：「我唔方便講，我乜都唔知，我哋（一班股東）冇人知。其實我唔係股東，我係幫我朋友利生（利承武）搞，因為佢唔鍾意高調，而且佢本身業務好忙，不過我唔係咁方便講，因為我哋任何一個人講嘢，寇鴻萍都好敏感，好大反應，佢依家人在上海，等佢返嚟睇吓點先。」對於有指另一股東汪詩詩早前表示開業至今的分發錢次數不多，蘭子直認不諱：「係事實，（你哋係契姊妹，依家因財失義？）我唔係佢契妹好耐，（有條刺？）我係基督徒會寬恕人。」

承認股東暗中開會

直呼寇鴻萍全名的蘭子，又指對方暗寸她不是股東不需多問，但每每又SMS她向她交代酒吧事宜，令她摸不着頭腦。問到她怎樣與利生交代事件？她續說：「今次利生都有失望，其實佢係生意人，金額唔係咁重要，even（甚至）汪詩詩都唔係着重錢，但最緊要交代清楚，而且做朋友最緊要有溝通，依家成班股東乜都唔知，對於佢欠溝通覺得唔舒服。」她又謂一班股東已暗地裏開過兩次會，希望得到了解，問到會否打算退股？她欲言又止地說：「文件上好複雜，總之寇鴻萍好敏感，等佢返嚟傾咗件事再睇吓點啦，大家都係想得個明白。」

汪詩詩欲為夫退股

至於身在上海的寇鴻萍則說：「我唔喺香港，酒吧嘅嘢已經交晒畀律師處理，所以唔方便講。」對於蘭子高調與她「斷契」？她說：「係咩？其實我同佢從來都冇上契，不過大家同一教會，所以會以姊妹相稱。（因財決裂？）我哋真係好朋友，中秋節仲一齊食過飯，總之我知我自己感情事，唔需要同大家交代。」

汪詩詩亦坦言入股至今只分過兩、三次錢，她自爆老公甄子丹曾勸她退股：「我都驚會影響老公形象，佢都有叫我唔好做，不過我諗住等埋Isabella（寇鴻萍）11月返嚟開埋會先再決定。」