張栢芝弟弟張栢文將與拍拖年半的女友Fiona Kei拉埋天窗，早前栢文豪擲六位數，與未來老婆到歐洲影婚紗相，栢文透露Fiona甚得家人歡心，向來喜歡小孩的栢芝更叫他們「快啲生」！
張栢芝弟弟張栢文與本地時裝品牌Life老闆娘Fiona Kei拍拖年半，早前兩人到巴黎、尼斯、摩納哥及意大利等地兩星期拍婚紗照，Fiona全程更換足十套婚紗，二人又不時咀嘴，大晒幸福！
女友感動到喊
栢文昨日承認將與女友結婚：「其實今年年中我已經同佢求婚，當時女友仲感動到喊，我心情好興奮！（即興求婚？）唔係，成件事都計劃咗大半年。」他透露專程到歐洲多個國家拍照，因女友自小喜歡旋轉木馬：「我覺得香港嗰啲婚紗相好老土、好悶，Fiona又鍾意旋轉木馬，所以去咗巴黎，嗰度有好大座旋轉木馬，今次大約花咗六位數。」
忙搞車行生意
對於有報道指婚禮由栢芝資助，栢文謂：「冇呢啲嘢，冇贊助過我！栢芝亦冇去呢個trip！」他指栢芝與女友曾見面，二人亦很投契，栢文說：「栢芝都有叫我哋生，自己都有計劃，可能一至兩個啦！（叫栢芝傳生仔秘方？）方便都唔介意㗎，可以生多幾個！（湊Lucas當練習？）玩吓啫，Lucas咁乖好易湊！」他計劃年底或下年年頭結婚，或會在外國舉行婚禮：「依家仲諗緊，自己又忙緊搞車行生意，依家睇緊地方。」
文：音樂組