縱橫影壇近四十年，曾創下新藝城及東方電影等輝煌佳績的黃百鳴與Baby昨日接受訪問，黃百鳴表示：「天馬會以六千萬簽古天樂（古仔）拍七部戲，當年東方電影我三千萬簽甄子丹拍三部戲，結果成績有目共睹。（打造古仔做片約王？）佢本身已經炙手可熱，喜劇同劇情片都手到拿來，呢個價錢物超所值。古仔會參與天馬創業作《花田囍事2010》，套戲係《家有囍事2009》班底加熊黛林同Baby，預計明年賀歲檔喺中國、馬來西亞推出。」

為兒開山劈石

東方電影發展得如火如荼，問黃百鳴為何另搞公司？他說：「其實我仍然係東方電影嘅股東，只係退出咗董事局，將來佢哋開戲，我樂意幫手。我搞天馬電影係為咗個仔黃子桓，初期我會幫佢開山劈石，我希望佢青出於藍。（Tony Jaa同甄子丹套戲進行成點？）我哋初步接觸過Tony，佢都有興趣合作，但要從長計議。」

黃百鳴又大讚Baby大有潛質當巨星，他說：「Baby形象健康，好適合做喜劇，而且佢鏡頭外都好活潑，出道以嚟都咁受歡迎，絕對係明日嘅巨星。《花》片中佢做我個女，我相信佢同成班戲骨合作都應付得來。」

天馬以六千萬簽古天樂拍七部戲。

黃百鳴將以《家有囍事2009》班底開拍《花田囍事2010》。 （資料圖片）

Baby自認搞笑

Baby聽到黃百鳴大讚後即說：「好感謝，我會繼續努力，好期待同吳君如佢哋合作。我平時都好搞笑，有信心可以應付到角色需要。（同緋聞男友陳偉霆一樣，打算喺影圈大展拳腳？）大家係不同嘅個體，各有各發展！」 另外，Baby經理人Kim表示，正有日本公司邀請Baby拍日本電影。

文：影視組