其後城城直奔往荃灣，出席《阿童木》宣傳活動。台上繼續表現風騷，但事先則透過公關傳話，不欲回答活動以外的問題。

記者：記　郭富城：城

記：你係咪好開心？

城：我係好開心。

記：昨晚餐飯食得好開心？

城：我唔明你哋咩意思。

私事一律不答

記：Lynn……

城：工作以外嘅事我唔答，希望大家明白，又有部攝影機影住我，我做得邊啲訪問好？

記：咁你月尾生日有冇假放？

城：到時應該喺泰國，我唔會特別要求放假，做嘢要投入，好似今日我特登飛返嚟好頻撲。

記：你啲普通話進步咗好多。

城：不嬲都進步，我搵咗個由北京嚟嘅普通話導師，啱啱都喺機場撞到佢……（下刪數百字）

記：有咩生日願望？

城：工作順利啲，拍多啲好嘅電影。媽媽近年身體唔係咁好，我想自己同佢都身體健康。

記：老人家想唔想早啲飲新抱茶？

城：呢啲我識得處理。

記：係咪引咗好多狗仔隊去泰國？

城：係好多傳媒唔知想探班，定有其他嘢要做，暫時都冇影響到我哋嘅拍攝，會唔會封鎖防線就要等電影公司決定。

記：以後都唔講感情事？

城：以後嘅嘢以後先算。

此時記者七嘴八舌，追問他Lynn種種，以及Amanda S.早前的言論，想不到城城突然發難：「你哋問我啦！問我啦……你哋鍾意點寫就點寫……」

急飛泰國復工

活動完結後，城城約於五時四十五分再出現機場，問到是否趕返泰國開工，他即滔滔不絕，但再被問到有關Lynn，他即臉色一沉，拒絕回應，且急步入閘。

另外，《B+偵探》導演彭順表示城城未有向劇組要求，本月二十六日生日要休息，反而十七日已申請放假，再次飛返港出席《阿童木》首映。