Lynn獲城城「點燈」，飛往泰國慶祝前日29歲生日，經過四日三夜的「閉門party」後，兩人昨日前後腳返港。Lynn於下午二時四十分現身，出閘時間剛好遲城城兩小時。素顏的Lynn經城城「滋潤」過後，明顯充滿力量，容光煥發，心情靚到爆燈，企定定任影任問。雖談及城城均「欲言又止」，而且有點緊張，要緊握女助手「定驚」，但觀乎Lynn的勝利笑容，可見「攻城」之戰又告凱旋。

記者：記　熊黛林：Lynn

記：係咪好開心呀？

Lynn：係呀，生日好開心，又可以放假。

記：生日一個人過？

Lynn：其他唔講。

否認攻城勝利

記：有報道話你哋全程喺酒店喎？

Lynn：我有出去。

記：生日當晚點過呀？

Lynn：真係唔講。

記：覺得自己（攻城）勝利？

Lynn：冇乜勝唔勝利，生日好平常。

記：最想城城確認你城嫂身份？

Lynn：唔係。（急住答）

記：城城送乜禮物畀你？

Lynn：已經收到好多朋友嘅禮物，乜都有。

記：你去泰國係搵城城？

Lynn：我係自己放假。

說到此時，本邊行邊答的Lynn終於停步受訪。

記：你真係冇搵城城？

Lynn：生日放假，好輕鬆，好開心。

記：72小時做過乜？

Lynn：好簡單。

唔鍾意做城嫂

記：有食飯（慶祝）？

Lynn：一定食飯。

記：兩個人一齊食？

Lynn：呢個唔答好冇？（嗲聲加冧笑）

記：怕唔怕畀人話你送上門？

Lynn：哈哈……（又係冧笑）擔心咩都冇用，唯一可以做嘅嘢係講少啲。

記：你依家可以變做城嫂？

Lynn：（先語塞）呢樣嘢我唔鍾意。唔鍾意畀人咁叫我，因為怕人覺得係自己講。

記：想唔想確認城嫂地位？

Lynn：想做番自己。

記：有乜生日願望？

Lynn：冇乜特別，希望自己永遠開心。

記：幾時結婚？

Lynn：冇諗咁多。

記：刻意同城城前後腳返？

Lynn：（即啞咗）唔該晒。

記：城城到底送乜生日禮物畀你？

Lynn：（諗咗成三、四秒，露尷尬表情）呢個唔講。

接住Lynn上保母車離開機場，在返香閨前，先到西半山一寵物店接回因她赴泰攻城而要寄養的愛犬。

採訪：音樂組