30歲的曹格因醉酒兼誤會錯打側田，事件經本報獨家披露後，曹格即時取消北京工作，並於前晚急急返港公開謝罪。昨午曹格現身機場準備飛長沙出席商業演出，問警方有冇聯絡他？曹格說：「冇，自己都冇聯絡警方。（打畀太太？）冇。（台灣傳媒搵咗你太太回應？）睇報道知。」問他心情有冇好些？曹格即露出苦笑入閘。

知會無綫取消個騷

據知，恨錯難返的曹格情緒大受困擾，對自己的行為感到深深懊悔，遂向經理人及唱片公司滾石主動提出，停工兩星期作徹底反省，惟長沙的工作因時間太少趕不及取消，但原定下周二為無綫演出的《曹格別具一格Super Show》就取消了，無綫高層陳家揚接受本報訪問時承認：「上午接到香港滾石通知，曹格因情緒不穩，取消未來兩星期工作，滾石向無綫道歉。」

至於曹格原定11月14日假亞洲國際博覽館舉行的香港演唱會能否如期舉行，主辦機構bma董事總經理陳志昂表示：「主辦單位仲同經理人公司商討，周日會有決定，呢兩星期滾石想曹格休息吓，因為佢情緒比較亂，想佢冷靜吓，所以28日嘅演唱會綵排都取消。」

而曹格前晚接受崔建邦訪問，問他有冇受事件影響萌生退出念頭？曹格說：「冇，咁做更加自私，做錯咗唔可以閃、逃避。（有乜方法令人接納番你？）冇辦法！可以做嘅係改變自己，希望大家接受。（怕唔怕事業毀於一旦？）冇得怕，呢個低潮未必最低，今日唔知明日事。」

陳貝兒：勇於承擔

又據其身邊人透露：「曹格昨晚冇瞓過，精神狀態好差，壓力好大，佢話腦裏一片空白，好唔開心，覺得對側田唔住，自己行為好愚蠢，問朋友有冇醫生介紹，幫佢解決情緒問題。」此外，bma藝人陳貝兒昨日出席活動時表示，她認為曹格是勇於承擔的男人，覺得他由北京返港開記者會已是誠意十足。

據知，曹格已與太太吳速玲通電話，並得到太太支持，指她和兒子都很好，不用擔心，希望曹格好好處理自己的事情。

文：音樂組