簽約黎明公司的Janice昨日聯同老闆娘Gaile為時裝品牌Ted Baker行騷，二人各示範三套時裝，Gaile以打頭陣及壓軸出場，盡顯一姐地位。身高只有168cm的Janice獲大會體恤，臨完場當所有模特兒出來擺甫士時，她與Gaile分別坐在椅子上，其餘模特兒則站在後面，免卻Janice與其他模特兒的身高作直接比較，避免尷尬。

易搵男拍檔

Janice對被指身材不高，因獲Gaile帶挈才有份行騷的報道表示未有留意，她稱今次是加入新公司後首度與Gaile合作，但之前二人已合作過，她認為身高由母親賜予，自己不能控制，並笑言：「唔知我呢個歲數停咗長高未﹖我唔會因為身高令工作局限而唔開心，反為我拍戲搵男拍檔都容易啲。身高喺香港巿場唔係太重要，當然愈高着得件衫愈靚，但最重要係Carry到件衫同有自己性格。（係咪Gaile帶挈先有騷行﹖）我以前都有行騷，但唔密，我同個客合作得開心就得，唔會理咁多。」

不抗拒baby

Janice稱復工後兩個月工作不斷，問到會否怕被指爛接Job時，她坦言公司會為她過濾及精選工作。提到好友Angelababy，Janice指大家工作忙未有見面，但不介意同場行騷：「點會抗拒，大家見到好開心，不過行騷係人揀我，我控制唔到。（羨慕對方喺日本發展﹖）各有各發展，唔一定話Focus邊方面先係好，邊度都要試，公司幫我Plan緊，月尾會拍戲。」工作多多的她，今日將為法國品牌Agatha擔任模特兒行首飾騷。

至於Gaile完騷後，識做地企定與Janice合照，之後便火速換衫離開，自從承認與黎明已婚的她例牌不接受訪問。

文：名人組